काँग्रेस सभापति बन्न म जेन्युइन तरिकाले लागेको छु, कुनै हालतमा पछि हट्दिन: प्रकाशमान सिंह

नेपाली कांग्रेसका पूर्वमहामन्त्री प्रकाशमान सिंहले आफू सभापतिको उम्मेदवारीबाट आफू पछि नहट्ने बताएका छन्।

काठमाडौंको नयाँबानेश्वरस्थित छक्कुबक्कु पार्कमा कृष्णप्रसाद भट्टराईको शालिक अनावरण गर्दै उनले भोलि सुरु हुने १४ औँ महाधिवेशनमा सभापतिको उम्मेदवारी दिने बताएका हुन्।

संस्थापनइतरबाट आफू नै साझा उम्मेदवार हुने उनको दाबी छ । ‘सभापतिमा उठ्नका लागि म जेन्युइन तरिकाले लागेको छु,’ उनले भने, कुनै हालतमा पछि हट्दिनँ।’

मंगलबारदेखि निरन्तर छलफल जारी रहे पनि इतरसमूहका शीर्ष नेताहरुबीच सहमति हुन नसक्दा साझा उम्मेदवार तय हुन सकेको छैन ।

सो समूहबाट नेता सिंहसहित वरिष्ठ नेता रामचन्द्र पौडेल, शेखर कोइराला तथा शशांक कोइरालाले सभापतिमा दाबी गरेका छन्।