ओलीको सर्वसम्म अध्यक्ष बन्ने योजनामा तुसारापात, भीम रावल द्वारा एमाले अध्यक्षमा उम्मेदवारी घोषणा

एमाले उपाध्यक्ष  भीम रावलले पार्टी अध्यक्षमा उम्मेदवारी घोषणा गर्ने भए सँगै ओलीको सर्वसम्म अध्यक्ष बन्ने योजनामा तुसारापात हुने आकलन गरिएको छ ।  रावलले आइतबार राजधानीमा विशेष पत्रकार सम्मेलन गरेर अध्यक्षमा उम्मेदवारी घोषणा गर्न लागेको रावल निकट स्रोत बताउँछ ।

रावलले टीम बनाएरै चुनाव लड्नेगरी तयारी थालेको बताइएको छ ।  चितवनमा आगामी मंसिर १०–१२ सम्म हुने महाधिवेशनमा वर्तमान उपाध्यक्ष रावलले उम्मेदवारी दिने भएसँगै केपी ओलीको सर्वसम्मत अध्यक्ष बन्ने योजनामा धक्का लाग्ने देखिएको छ ।

एमाले संस्थापनले महाधिवेशनबाट अध्यक्षसहितको पदाधिकारी सर्वसम्मतरुपमा छान्ने कसरत गर्दै आएको छ ।

ओलीको क्रियाकलापप्रति असन्तुष्ट रावललगायतले पार्टी रुपान्तरण हुनुपर्नेमा जोड दिँदै आएका छन् । एमालेका तत्कालीन वरिष्ठ नेता माधव कुमार नेपालसँग निकट मानिने रावललगायत नेपालले पार्टी फुटाउँदा भने एमालेमै संघर्ष गर्ने भन्दै साथ दिएका थिएनन्।