खेलकुद मन्त्रीको खेलाडीलाई सुझाव : प्रकाश दाहाल जस्तै जुझारु हुनुहोस्

युवा तथा खेलकुद मन्त्री महेश्वरजंग गहतराजले स्वर्गीय प्रकाश दाहाल निडर र जुझारु स्वभावको व्यक्ति भएको बताउँदै खेलाडीहरू पनि उनीजस्तै बन्न सुझाव दिएका छन् । आफूले निकै नजिकबाट दाहालको जुझारुपन महसुस गरेको बताउँदै मन्त्री अथकले खेल क्षेत्र र खेलाडीहरूमा पनि त्यस प्रकारको जुझारुपन आवश्यक रहेको बताएका हुन् ।

स्व. प्रकाश दाहालको स्मृतिमा आयोजित दोस्रो राष्ट्रिय बक्सिङ प्रतियोगिताको उद्घाटन समारोहमा बोल्दै मन्त्री गहतराजले दाहालको व्यक्तित्वबाट आफू निकै प्रभावित भएको उल्लेख गरे ।

सामाजिक रूपान्तरणको मोर्चा हुँदै सगरमाथाको सफल आरोहणसम्मको चरणमा दाहालले ठुलो सामर्थ्य देखाएको स्मरण गर्दै मन्त्री गहतराजले नेपाली खेल क्षेत्रको विकासमा दाहालको भूमिकाको खुलेर प्रशंसा गरे ।  दाहालको व्यक्तित्वसँग मिल्ने खालको खेल सञ्चालन गरेको प्रति खुसी व्यक्त गर्दै मन्त्री अथकले भने, “बक्सिङ बहादुरहरूको खेल हो, स्व. प्रकाश दाहाल पनि निकै बहादुर थिए ।”