प्रधानमन्त्री बन्ने बित्तिकै भारत जाने परम्परा तोडेका देउवाले स्कटल्यान्डमा पुगेर मोदीलाई भेटे

प्रधानमन्त्री बन्ने बित्तिकै भारत जाने परम्परा परम्परा तोडेका प्रधानमन्त्री शेरबहादुर देउवाले स्कटल्यान्डमा पुगेर भारतीय प्रधानमन्त्री नरेन्द्र मोदी सँग भेट गरेका छन् ।

प्रधानमन्त्री शेरबहादुर देउवा र भारतीय प्रधानमन्त्री नरेन्द्र मोदीबीच स्कटल्याण्डमा भेटवार्ता भएको हो । जलवायु परिवर्तन सम्बन्धी अन्तर्राष्ट्रिय सम्मेलनमा भाग लिन स्कटल्याण्डको ग्लास्गोमा गएको बेला उनीहरुबीच भेटवार्ता भएको छ ।

भेटवार्तामा प्रधानमन्त्री देउवाले नेपालगञ्ज र महेन्द्रनगरबाट हवाईजहाज प्रवेश विन्दुलाई अनुमति दिन र रासायनिक मलको सहज आपूर्ति गर्न आग्रह गरेका थिए ।

जवाफमा भारतीय प्रधानमन्त्री मोदीले नेपालको आवश्यकता र खाँचोलाई सकारात्मक रुपमा लिने बचन दिएको भेटमा सहभागी परराष्ट्र मन्त्रालयका सचिव भरतराज पौड्यालले जानकारी दिए ।

‘सम्माननीय प्रधानमन्त्रीज्यूले नेपालले अनुरोध गरिराखेको नेपालगञ्ज र महेन्द्रनगरबाट हवाईजहाज इन्ट्री गर्ने प्वाइन्ट स्वीकृति दिनुपर्यो भन्ने कुरा गर्नुभयो । उहाँले चाहिं तपाईंहरुको आवश्यकता, तपाईंहरुको खाँचोलाई हामीले सकारात्मक रुपमा हेर्छौं भन्नुभयो,’ सचिव पौड्यालले भने ।

यसैगरी प्रधानमन्त्री देउवाले भारतको सदभाव पाइराखेको भन्दै रासायनिक मलको आपूर्ति निरन्तर रहोस् भन्ने विषयमा अनुरोध गरेका थिए । सो विषयमा मोदीले भारतको आवश्यकता जे हो त्यही आवश्यकता नेपालको पनि हो भन्ने ठानेर पूर्ण सहयोगको वचन दिएको सचिव पौड्यालले बताए ।