बयलगाडाको सोच भएकाहरु ओलीतिर लम्पसार छन् : नेपाल

नेकपा एसका अध्यक्ष तथा पूर्व प्रधानमन्त्री माधवकुमार नेपालले बयलगाडाको सोच हुनेहरु केपी ओलीतिर लाग्ने बताएका छन् ।

विराटनगरमा नेकपा (एसले) आज आयोजना गरेको शुभकामना आदानप्रदान कार्यक्रममा बोल्दै नेपालले एमालेमा ९ रेक्टरस्केलको भूकम्प गएकोले आफ्नो घर नै असुरक्षित भई नयाँ पार्टी गठन गरेको सुनाए ।

उनले भने,”हामी नक्कली कुरामा विश्वास गर्दैनौं । नयाँ कुरा गर्दै नयाँ बाटो बनाएर हिंड्नु पर्छ । नयाँ सिर्जना गर्नुपर्छ भनेर नयाँ पार्टी बनाएको हो । केपीको दम्भका कारण उनी सत्ताको घोडाबाट भुईंमा बझारिएका छन् ।”

नेपालले २८ वर्ष पहिले आफू विराटनगर आएको र महेन्द्र मोरङ्ग क्याम्पस पढेर बैंकमा जागिर खाएको स्मरण गरे । पछि जागिर छाडेर राजनीतिमा लागेको र त्यसबेला एकजना रामचन्द्र यादव पनि मोरङमा सक्रिय रहेको भन्दै नयाँ पार्टीले नयाँ उत्साह दिएको भन्दै गफ गरेर मात्र पार्टी नचल्ने बताए ।