सत्ता गठबन्धनको बैठक बस्दै, आजै मन्त्रीपरिषद् विस्तार हुने

काठमाडौं – सत्ता गठबन्धनमा आवद्ध पाँच दलका शीर्ष नेताहरुको बैठक आज बस्दै छ । बैठक बिहान नौ बजे प्रधानमन्त्री निवास बालुवाटारमा बस्ने प्रधानमन्त्रीको सचिवालयले जनाएको छ ।

बैठकमा अमेरिकी अनुदान सहयोग परियोजना एमसीसी, मन्त्रिपरिषदको पूर्णता लगायतका विषयमा छलफल हुने स्रोतले जनायो ।

२०७४ भदौ २९ मा शेरबहादुर देउवा नेतृत्वको तत्कालीन सरकार र एमसीसीबीच ५ सय मिलियन डलर (करिब ५५ अर्ब रुपैयाँ) अनुदान सहयोग सम्बन्धी सम्झौता भएको थियो ।

सम्झौता अनुमोदन गर्न केपी शर्मा ओली नेतृत्वको सरकारले २०७६ असार ३० मा प्रतिनिधिसभामा दर्ता गराएको थियो । तर दलहरूबीच सहमति हुन नसक्दा संसदबाट अनुमोदन हुन सकेको छैन ।

सम्झौता कार्यान्वयनको प्रगतिबारे बुझ्न एमसीसी उपाध्यक्ष फातिमा सुमार नेतृत्वको टोली बिहीबार काठमाडौं आएको छ ।

काठमाडौं आएकै दिन यो टोलीले एमाले अध्यक्ष केपी शर्मा ओली, नेकपा एकीकृत समाजवादीका अध्यक्ष माधव कुमार नेपाल र जनता समाजवादी पार्टी जसपाका अध्यक्षद्वय उपेन्द्र यादव र डा. बाबुराम भट्टराईसँग छलफल गरिसकेको छ ।

छलफलको क्रममा सुमारले एमसीसी अमेरिकाको सैन्य रणनीतिअन्तर्गत नभएको बताएकी छन् ।

त्यस्तै आजै मन्त्रीपरिषद् विस्तार गर्ने तयारी गरिएको बालुवाटार श्रोतको भनाई छ । नेकपा माओवादी केन्द्र र नेपाली कांग्रेसका केही नेतालाई मन्त्रीमा नियुक्त गर्ने तयारी गरिएको श्रोतको दावि छ ।

नेकपा एकीकृत समाजवादी पार्टीले एमालेले कारवाही गरेका १४ नेताहरुको विषय अदालतमा रहेकाले तत्काल सरकारमा सहभागी हुन नसकिने जनाएको छ । जनमोर्चाले पहिला नै सरकारमा नजाने स्पष्ठ पारिसकेको छ ।