६० लाख खर्चेर त्यो पनि सुँगुरको मूर्ति पत्याउनु हुन्छ ?

६० लाख खर्चेर त्यो पनि सुँगुरको मूर्ति पत्याउनु भएन होला हैन ? तर उदयपुर जिल्लाको बेलका नगरपालिकामा धार्मिक तथा पर्यटकीय उद्देश्य राखेर  ६० लाख खर्च गरेर सुँगुरको मूर्ति निर्माण गरिएको छ ।

बेलका नगरपालिका जहाँ सुँगुरको मूर्ति निर्माण द्रुत गतिमा भइरहेको छ । बेलका नगरपालिका प्रदेश नम्बर एकको उदयपुरमा पर्छ जुन ठाउँलाई पर्यटकीय हिसाबले अगाडि बढाउने उद्देश्य सहित सुँगुरको मूर्ति निर्माण कार्य अन्तिम चरणमा पुगेको छ ।

सुंगुरको मूर्तिको उचाइ १२ फिट छ भने लम्बाई १६ फिट रहेको छ । नगरपालिले आफ्नै खर्चमा सो मूर्ति  आफैँले बनाएको हो । आउँदो दसैँसम्म उद्घाटन गर्ने तयारी समेत थालिएको छ ।

सुंगुरको यो मूर्तिको डिजाइन राष्ट्रिय प्रज्ञा प्रतिष्ठानले गरेको थियो । अहिले धनु याख्खा कलाकारले उक्त मूर्ति बनाइराखेका छन् ।

जुन ठाउँमा मूर्ति बनाउन लागिएको हो त्यही ठाउँबाट बराह अर्थात् बँदेल हाम फालेर बराह क्षेत्रमा पसेको भन्ने किम्बदन्ती रहेको छ ।