बिहीबार चीनबाट थप १० लाख डोज भेरोसेल खोप आउँदै, कोभ्याक्सबाट थप ३ लाख ५० हजार डोज आउने

आगामी दुईसाताभित्र चीनबाट कोभिड–१९ विरुद्ध न्यूनतम ३० लाख डोज भेरोसेल खोप नेपाल आइपुग्ने भएको छ ।

सोहीअनुसार नेपाल वायुसेवा निगमले उडान तालिका तय गरेको छ । निगमका प्रबन्ध निर्देशक डिमप्रकाश पौडेलले आउने बिहीबार थप १० लाख खोप आउने जानकारी दिए । बुधबार निगमको वाइडबडी जहाज बेइजिङ प्रस्थान गर्ने कार्यक्रम छ ।

पौडेलका अनुसार चीनसँग खरीद गरिएका खोप लिन यही साउन ६ गते पौनै ६ः०० बजे गएर अर्को दिनअर्थात् साउन ७ गते बिहान खोप लिएर जहाज नेपाल आउने छ ।

यस्तै साउन ७ गते पुनः जहाज गएर साउन ८ गते र साउन ९ गते गएर जहाजले साउन १० गते खोप नेपाल ल्याउने छ ।

चीन सरकारसँग ननडिस्क्लोजर सम्झौताअनुसार सरकार ‘भेरोसेल’ खोप खरीद गरेर ल्याउन थालेको हो ।

यसअघि असार २५ गते आठ लाख मात्रा खोप चीनबाट ल्याइएको थियो । सरकारले चीनबाट खोप ल्याएपछि नियमितरुपमा खोप अभियान पनि सञ्चालन गरिरहेको छ ।