ब्युँताइयो युथ फोर्स, दुई हजार गाडी र तीन हजार मोटरसाइकलले स्कर्टिङ गरी ओलीलाई बालकोट पुर्‍याउँछौं: महेश बस्नेत

नेकपा एमालेका नेता तथा राष्ट्रिय युवा संघका इन्चार्ज महेश बस्नेतले भोलि अध्यक्ष केपी शर्मा ओलीलाई बालकोटमा स्वागतको लागि भव्य तयारीमा लाग्न निर्देशन दिएका छन् ।

सर्वोच्चको परमादेशले कांग्रेस सभापति शेरबहादुर देउवा प्रधानमन्त्रीमा नियुक्त भएपछि निवर्तमान प्रधानमन्त्री ओली सरकारी निवास बालुवाटार छाडेर भोलि बालकोट जाँदै छन् ।

आज युथ फोर्स गठनसँगै बस्नेतले बालकोटस्थित निवास प्रस्थान गर्दा ओलीलाई २ हजार गाडी र ३ हजारवटा मोटरसाइकललले स्वागत गर्ने बताए । उनले प्रधानमन्त्री शेरबहादुर देउवाले ३० दिनभित्र विश्वासको मत लिन नसकी पुनः नेकपा एमालेकै सरकार बन्ने दावी समेत गरेका छन् ।
युथ फोर्स फेरि जन्मिएको छ । युथ फोर्स किसानको घरको सिरानमुनी राखिएको खुकुरीजस्तै हो । र, संकट पर्‍यो भने यसलाई फेरि निकालिनेछ भनेर हामीले भनेका छौँ ’, युथ फोर्सलाई ब्युँताएपछि बस्नेतले भने, ‘युथ फोर्स अहिले जन्मिएको छ । यसले नेकपा एमालेको सिद्धान्त विचारको रक्षा गर्ने छ । जनताको बहुदलीय जनवादको प्रयोग गर्ने सन्दर्भमा , यसलाई रक्षा गर्ने सन्र्दभमा र यसलाई विस्तार गर्ने सन्दर्भमा यसले महत्वपूर्ण भूमिका खेल्नेछ । यसले आवाजविहीनको आवाज उठाउन भूमिका खेल्ने छ ।’

नेकपा एमालेमाथिको घेराबन्दी तोड्दै आवश्यकता अनुसारको प्रतिकारका लागि योजना बनाउन बस्नेतले निर्देशन दिएका छन् ।