गगन र प्रदीपले सिटौला क्याम्प छोडेकै हुन त ? सिटौलाले बोलाएको भेलामा दुबै नेता अनुपस्थित

नेपाली कांग्रेसका पूर्वमहामन्त्री कृष्णप्रसाद सिटौला निकट नेता कार्यकर्ताहरुको भेला अहिले बत्तीसपुतलीस्थित अनुपम फुडल्याण्डमा जारी छ ।  सिटौला निकट मानिदै आएका गगन थापा र प्रदीप पौडेल भेलामा अनुपस्थित भएका छन ।

१३ औं महाधिवेशनमा सभापतिमा प्रतिस्पर्धा गरेका नेता सिटौलाले आसन्न महाधिवेशनबारे रणनीति बनाउन आफ्नो समूहका नेता कार्यकर्तालाई छलफलमा बोलाएका हुन् ।

भेलामा सिटौलासहित नेताहरू उमाकान्त चौधरी, शिव हुमागाई, भीमसेन दास प्रधानलगायत उपस्थित छन् । त्यस्तै उनी निकटका अन्य नेता, भ्रातृसंस्थाका पदाधिकारीहरू पनि छन् ।

कांग्रेसमा तेस्रो धार भनेर चिनिने सिटौला समूहबाट आगामी महाधिवेशनमा समूहगत दावेदारी दिने विषयमा भेलामा छलफल हुने बताइएको छ । ‘तल्लो तहका अधिवेशनमा कसरी प्रस्तुत हुनेदेखि महाधिवेशनमा कसरी जाने भन्नेमा छलफल भइरहेको छ’, भेलामा सहभागी एक नेताले भने ।

सिटौला समूहका प्रभावशाली नेताहरू गगन थापा र प्रदीप पौडेल भने भेलामा सहभागी छैनन् । कांग्रेसका पूर्वआमन्त्रित केन्द्रीय सदस्य रामजी कुँवरको निधनपछि परिवारसँग भेटघाट गर्न थापा पोखरा गएका कारण भेलामा अनुपस्थित रहेका हुन् । पौडेल भने क्रियाशील सदस्यता छानविन समितिको काममा व्यस्त भएका कारण भेलामा सहभागी नभएका हुन् ।