राष्ट्रियसभालाई सम्बोधन गर्ने राष्ट्रपतिको इच्छा

राष्ट्रपति विद्यादेवी भण्डारीले राष्ट्रियसभाको बैठकलाई सम्वोधन गर्ने चाहना व्यक्त गरेकी छिन् । आइतबार वा सोमबारको राष्ट्रियसभाको बैठकमा राष्ट्रपति उपस्थित हुने र बैठकलाई सम्वोधन गर्ने राष्ट्रियसभाका अध्यक्ष गणेशप्रसाद तिमिल्सिनाले जानकारी दिएका छन् ।

विहीबार बसेको राष्ट्रियसभा कार्यव्यवस्था परामर्श समितिको बैठकमा अध्यक्ष तिमिल्सिनाले राष्ट्रियसभाको बैठकलाई राष्ट्रपतिले सम्वोधन गर्न चाहेको जानकारी गराएका हुन् । राष्ट्रपतिले आइतबार वा सोमबार सम्वोधन गर्ने तिमिल्सिनाले समितिलाई जानकारी दिए ।
उता, संसद सचिवालयका कर्मचारीहरु भने दुबै सदनको संयुक्त अधिवेशन आह्वान गर्ने र सरकारको नीति तथा कार्यक्रम प्रस्तुत गर्नेबाहेक अरूबेला राष्ट्रपतिले संसदमा यसरी उपस्थित हुने परम्परा नरहेको बताउँछन् ।

राष्ट्रियसभाको बैठकलाई राष्ट्रप्रमुखले सम्वोधन गर्ने संसदीय परम्परा नरहेको संसद सचिवालयका एक कर्मचारीले बताए ।

यद्यपि, संविधानको धारा ९५ को उपधारा १ ले राष्ट्रपतिलाई राष्ट्रिय सभाको बैठकमा सम्वोधन गर्ने ईच्छा जागेमा ढोका चाहिँ थुनेको छैन । धारा ९५ (१) भनिएको छ,‘राष्ट्रपतिले संघीय संसदको कुनै सदनको बैठक वा दुबै सदनको संयुक्त बैठकलाई सम्वोधन गर्न र त्यसका लागि सदस्यको उपस्थिति आह्वान गर्न सक्ने छ ।’

तर, धारा ९५ को उपधारा २ लाई हेर्ने हो भने राष्ट्रपतिले प्रतिनिधिसभाको अधिवेशनलाई र संयुक्त सदनको बैठकलाई सम्बोधन गर्ने किटेर लेखिएको छ ।
संविधानको धारा ९५ (२) मा भनिएको छ,‘राष्ट्रपतिले प्रतिनिधिसभा निर्वाचनपछिको पहिलो अधिवेशन र प्रत्येक वर्षको पहिलो अधिवेशन प्रारम्भ भएपछि संघीय सदनको दुबै सदनको संयुक्त बैठकलाई सम्वोधन गर्नेछ ।’