एमालेको ‘नेपाल-खनाल’ समूहले तत्काल राजीनामा नदिने

नेकपा एमालेको ‘नेपाल–खनाल’ समूहले तत्कालै राजीनामा नदिने भएको छ ।

आज बिहान वरिष्ठ नेता माधवकुमार नेपाल र नेता विष्णु पौडेलबीच भएको छलफलपछि नेपाल–खनाल समूह तत्काल राजीनामा नदिने मनसायमा पुगेको हो ।

नेता सोमप्रसाद पाण्डेले दिएको जानकारीअनुसार अब अध्यक्ष केपी शर्मा ओलीको आगामी कदम हेरेर राजीनामा बारे निर्णय हुनेछ । उनले भने,‘अहिले भर्खर राजीनामा दिने कुरा छैन । अहिले अन्य विषयमा छलफल भइरहेको छ । हामी अहिले पनि छलफलमा छौँ।’

आज बिहान वरिष्ठ नेता नेपालसँग छलफल गर्न नेता विष्णु पौडेल नेपाल निवास कोटेश्वर पुगेका थिए । छलफलमा नेता सोमप्रसाद पाण्डे पनि सहभागी थिए ।

आजै बसेको एमालेको स्थायी कमिटि बैठकले वरिष्ठ नेता नेपालसँगै नेताहरु भीम रावल, सुरेन्द्र पाण्डे र घनश्याम भुसालमाथि गरेको कारबाही फुकुवा गर्ने निर्णय गरेको थियो ।