लुम्बिनीमा माओवादीका दुई सांसदको पद धरापमा, सरकारबाट बाहिरिने तयारी

नेकपा माओवादी केन्द्र छाडेर एमालेमा प्रवेश गरेका लुम्बिनी प्रदेशका सांसदद्वय दधिराम न्यौपाने (रुपन्देही) र दिनेश पन्थी(गुल्मी) लाई माओवादीले कारवाही गर्ने भएको छ । एमालेमा प्रवेश गरेर ओली समूहको केन्द्रीय सदस्य बनेका न्यौपाने र पन्थीलाई पार्टीले कारवाही गरेपछि उनीहरुको सांसद पद खारेज हुनेछ ।

लुम्बिनी प्रदेशमा माओवादी केन्द्रले मुख्यमन्त्री शंकर पोखरेललाई दिँदै आएको समर्थन फिर्ता लिने गृहकार्यसमेत सुरु भएको माओवादीका एक नेताले रातोपाटीलाई बताए । माओवादीले समर्थन फिर्ता लिएपछि मुख्यमन्त्री पोखरेलले बहुमत गुमाउने देखिएको छ ।

माओवादी छाडेर एमालेमा प्रवेश गरेपछि न्यौपाने र पन्थीलाई पार्टीले २४ घण्टे स्पष्टीकरण सोधेको थियो । तर, एक हप्ता बितिसक्दा पनि उनीहरुले स्पष्टीकरणको जवाफ दिएका छैनन् । माओवादी स्रोतले भन्यो, ‘स्पष्टीकरणको जवाफसमेत नआएकाले अब दुबैलाई कारवाहीको पत्र लेख्ने निर्णय भएको छ, अब उनीहरुको सांसद पद खारेज हुन्छ ।’