अमेरिकी विदेशमन्त्री पोम्पेओ अफगानिस्तान भ्रमणमा

काबुल– अमेरिकी विदेशमन्त्री माइक पोम्पेओ सोमबार अफगानिस्तानको राजधानी काबुल पुगेका छन् ।

अफगानिस्तानमा तालिबान विद्रोहीका कारण बढ्दो हिंसा, राजनीतिक अस्थिरता र बढ्दो कोरोनाभाइरसको सङ्क्रमणका कारण अफगानिस्तानको अप्ठेरो अवस्थाबीच उनी काबुल पुगेका हुन् ।

केही समय पहिले शान्ति वार्ताका लागि सहमति भएको भए पनि विकसित पछिल्लो घटनाक्रमका कारण अफगानिस्तानको शान्ति प्रक्रिया पनि थप खतरामा परेको बताइएको छ ।

पोम्पेओले अफगानिस्तानका राष्ट्रपति असरफ घानी र उनका राजनीतिक प्रतिद्वन्द्वी अब्दुल्ला अब्दुल्लाहसँग भेट गरेका छन् ।

तालिबानसँगको हालै भएको वार्तामा प्रमुख भूमिका निर्वाह गरेका राजदूत जाल्मे खालिलजादले पोम्पेओलाई काबुल एयरपोर्टमा पुगेपछि स्वागत गरेका थिए ।

अफगानिस्तान सरकार र तालिवानले कैदी आदानप्रदानको बारेमा पहिलो छलफल गरेको एक दिन पछि अमेरिकी विदेशमन्त्रीको यो भ्रमण भएको बताइएको छ ।