चौथो ३६१ डिग्री पिस प्वाइन्ट कपः तयारी पुरा, प्रथमलाई नगद २५ हजार

कात्ययानी चोक, मध्यवानेश्वरमा रहेको पिस प्वाइन्ट बोर्डिङ्ग हाई स्कूलको आयोजनामा चौथो ३६१ डिग्री पिस प्वाइन्ट कप अन्तरविद्यालय फुटबल प्रतियोगिता मंसिर १ गते आइतबारदेखि सुरु हुने भएको छ ।

शुक्रबार संवाद चौतारीमा पत्रकार सम्मेलनको आयोजना गरि आयोजकले जानकारी गराएको हो ।

मंसिर ८ गतेसम्म सानोगौचरण फुटबल मैदानमा संचालन हुने उक्त प्रतियोगिताको सम्पुर्ण तयारी पुरा भएको पत्रकार सम्मेलनमा जानकारी गराईएको छ । प्रतियोगितामा पुरुषतर्फ २२ टिम र महिलातर्फ १२ टिमले प्रतिस्पर्धा गर्नेछन् ।

नकआउट चरणमा संचालन हुने प्रतियोगितामा पुरुषतर्फ प्रथम, द्धितीय र तृतीय हुने टिमले क्रमश २५ हजार, १५ हजार र १० हजार नगद सहित ट्रफी, मेडल र प्रमाण–पत्र प्राप्त गर्ने छन् भने महिलातर्फ प्रथम, द्धितीय र तृतीय हुने टिमलाई नगद क्रमश १५ हजार, १० हजार र ७ हजार प्राप्त गर्नेछन् ।

यस्तै प्लेअर अफ सिरिज, हाइएष्ट स्कोरर्, बेष्ट गोलकिपर, बेष्ट डिफेन्डर, म्यान अफ द म्याच, बेष्ट कोच र इमर्जिङ्ग प्लेअर विधामा उत्कृष्ट हुने खेलाडीहरुलाई ट्रफीद्धारा पुरस्कृत गरिनेछ ।

फुटबल खेललाई अतिरिक्त क्रियाकलापहरुमा पिस प्वाइन्ट बोर्डिङ्ग हाई स्कूलले मेरुदण्डको रुपमा विकास गरिरहेको र विद्यालय जीवनबाटनै राष्ट्रिय स्तरका खेलाडी उत्पादन गर्न सहयोग पुर्याउने उद्देश्यले प्रतियोगिताको आयोजना गरिएको र विवादरहित ढंगले प्रतियोगिता सम्पन्न गराउन हदै तयारी गरिएको आयोजक विद्यालय पिस प्वाइन्ट बोर्डिङ्ग हाई स्कूलकी संस्थापक प्रिन्सिपल इशु गुरुङले बताउनु भयो ।