पुलको काम अलपत्र पारेर म्याद थप्दै ठेकेदार

बाँकेको राप्तीसोनारी गाउँपालिका वडा नम्बर ४ बैजापुरदेखि अगैया जोड्ने मोरंगा खोला पुल तीन वर्षदेखि अलपत्र छ ।

ठेकेदारले समयमा काम नगर्दा पुल अलपत्र परेको हो । पुल नहुँदा बर्खायामको बेला सर्वसाधारणले कष्टपूर्ण यात्रा गर्नुपर्छ ।

‘पुल नहुँदा धेरै समस्या भइरहेको छ, ठेकेदारले अनेक बहानाबाजी निर्माण कार्य लम्ब्याउने काम गरिरहेको छ,’ बैजापुका स्थानीइ हुमाशंकर ओलीले भने ।

अलपत्र पुलको विषयमा सडक डिभिजन कार्यालय सांसद र गाउँपालिकामा पटक–पटक धाउँदा पनि ठेकेदारले समयमै काम नगरेको गुनासो छ । पुल निर्माणको काम सम्पन्न भएमा अगैयाबाट छोटो दुरीमा नेपालगञ्ज आवतजावत गर्न सहज हुने स्थानीय बासिन्दाको अपेक्षा छ । यो समाचार आजको नागरिक दैनिकमा अर्जुन ओलीले लेखेका छन् ।