काठमाडौंका नदीमा पानीको सतह बढ्यो, सतर्कता अपनाउन आग्रह

काठमाडौं र आसपासमा शनिबार साँझदेखिनै अबिरल वर्षा भइरहेको छ । लगातारको परेको पानीले काठमाडौंको विभिन्न नदीमा पानीको सतह बढ्दै गएपछि सतर्कता अपनाउन बाढी पूर्वानुमान महाशाखाले आग्रह गरेको छ ।

राजधानीको विष्णुमती नदीमा बाढीले सतर्कता तह पार गरेको छ । अन्य नदीमा समेत सतह बढिरहेको छ । राति १० बजेसम्म पनि पानी निरन्तर परिरहेकाले पानीको बहाव अझ बढ्न सक्ने जनाइएको छ ।

बिष्णुमती नदीमा पानीको सतह २ दशमलव ६७ मिटर रहेको छ । पानीको सहत २ दशमलव ५ मिटरभन्दा माथि गए सतर्कता अपनाउनुपर्दछ । नयाँ बसपार्क क्षेत्रदेखि टेकु दोभानसम्मको तटीय होचा स्थानमा उच्च सतर्कता अपनाउन जल तथा मौसम विज्ञान विभागअन्तरग बाढी पूर्वानुमान महाशाखाले आग्रह गरेको छ ।