धादिङमा जीप दुर्घटना, चार जनाको मृत्यु

धादिङमा बोलेरो जीप दुर्घटना हुदाँ चार जनाको घटनास्थलमै मृत्यु भएको छ। गल्छी गाउँपालिका वडा नं ५ को सिरुवारीबाट बैरेनीतर्फ जाँदै गरेको बा १८ च ९४०८ नम्बरको जीप गल्छी गाउँपालिका वडा नं ६ बाँझगाउँमा दुर्घटना भएको हो। दुर्घटनामा ८ जना घाइते भएको प्रहरीले जनाएको छ। जीप माथिल्लो सडकबाट पल्टेर २० मिटर तल तल्लो सडकसम्म आइपुगेको प्रहरीले जानकारी दिएको छ ।

प्रहरी निरीक्षक हेमराज घिमिरेका अनुसार तरकारी बिक्री गर्न बजार झरेका किसानहरु चढेको जीप दुर्घटनामा परेको हो । मृतक र घाइतेको सनाखत भइसकेको छैन । घाइतेहरुको अहिले उद्धार गरी विभिन्न अस्पतालमा पठाउने क्रम जारी छ। प्रहरीको टोली घटनास्थलमा पुग्दै छ। थप विवरण आउन बाँकी रहेको छ।