यही अवस्था लम्बिएमा नाम चलेकै होटलहरु बन्द हुन सक्छन्

२०७२ माघ ३ गते ०७:४५ मा प्रकाशित


पाँचतारे अन्नपूर्ण होटलकी कार्यकारी निर्देशक हुन्, सृजना राणा । होटल संघ नेपाल (हान)मा पनि उपाध्यक्ष रहेकी राणाले होटल र संस्थाको जिम्मेवारीलाई संगसँगै अगाडि बढाएकी छिन् । भूकम्पपछि थलिएको नेपालको पर्यटन उद्योग त्यसपछिको तराई आन्दोलन र नाकाबन्दीले झनै जर्जर बन्दै गएको बताउँछिन् राणा ।

खानाको परिकार र सेवा सुविधामा व्यापक कटौती गर्दा पनि होटल सञ्चालन गर्न समस्या परेको राणाको भनाई छ । यहि अवस्था केही महिना लम्बिए सन् २००२/०३ मा जस्तै नाम चलेकै ठूला होटलहरु बन्द हुने उनको दावी छ । होटल व्यवसायमा परेको असर, समधानका उपाय, नयाँ लगानी लगायतका विषयमा अनलाइनखबरकर्मी नविन अर्यालले गरेको कुराकानी :

 

तपाईहरुले पर्यटन मन्त्रीलाई भेटेर बन्द हडतालले ८० प्रतिशत तारे होटलहरु बन्द हुने अवस्थामा पुगेको बताउनुभयो । साँच्चिकै होटलहरु बन्द हुने अवस्थामा पुगेका हुन् ?

यतिबेला होटलहरु निकै गम्भिर संकटबाट गुज्रिरहेका छन् । नाकाबन्दी र तराई आन्दोलनले इन्धनको निकै भाव छ । यही कारण अलिअलि भित्रिएका पर्यटकलाई पनि सेवा सुविधा दिन समस्या भइरहेको छ ।

यही अवस्था लम्बिएमा ८० प्रतिशतमात्र होइन, धेरै होटलहरु बन्द हुन्छन् । अभावको बिचमा यसरी कति दिन होटल चलाउन सकिन्छ र ? बजारमा ग्याँस पाइदैन, डिजेल पाइदैन । त्यसमाथि लोडसेडिङ चर्को छ ।

अहिले त हामीले मेनु र सेवा सुविधा कटौती गरेर भएपनि होटल खोलिरहेका छौं । यसरी धेरै दिन त थेग्न सकिदैन् । सन् २००२ र २००३ को संकटकालमा पनि ३५/४० वर्ष चलेका १०/१२ होटलहरु बन्द भएका थिए । त्यतिबेला नारायणी, शेर्पा, ब्लु बर्ड लगायतका होटलहरु बन्द गर्नुपरेको थियो । हामीले त्यही अवस्था आउन सक्छ भनेर समयमै सतर्क बनाउन खोजेका हौं ।

नाकाबन्दी र बन्द हडतालकै कारण अहिलेसम्म कुनै होटल बन्द भएका छन्?

वैशाख १२ गते गएको भूकम्पले पर्यटन व्यवसाय सुस्ताउन पुग्यो । त्यसमाथि अनिश्चितकालिन नाकाबन्दी र तराई आन्दोलनले त पर्यटन क्षेत्र थिलो-थिलो नै भएको छ । यस अवधिमा केही होटलहरु बन्द भए । सञ्चालनमा रहेका पनि निकै नाजुक अवस्थामा छन् । जब पर्यटक नेपाल आउँछन, उनीहरुले पाँचतारेको जुन स्टान्डर्ड खोज्छन, त्यो सेवा हामीले कुनै पनि हालतमा उपलब्ध गराउन सकेका छैनौं ।

लोडसेडिङ र इन्धन अभावले रेष्टुरेन्टको मेनुदेखि होटलको सेवा सुविधासम्म कटौती गर्नुपरेको छ । अहिलेसम्म जेनतेन कम क्षमतामा भएपनि होटलहरु चलिरहेका छन् । यही अवस्था लम्बिएमा धेरै होटलहरु बन्द हुने अवस्था देखिँदै छ ।

होटलको मेनु र सेवा सुविधा कटौती गरेका छौं भन्नुभयो । मेनु कटौती त अहिले समान्य जस्तै भएको छ । तर, तपाइँले सेवा सुविधा नै कटौती गरेको भन्नुभयो । कस्ता सुविधा कटौती गर्नुपरेको छ ?

ग्याँसको अभावमा मेनुको आकार घटेको छ । होटलको मेनुमा धेरै परिकारहरु हुने गर्छन । होटलमा दैनिक ५०/६० भेराइटी पाक्थ्यो भने अहिले १०/१५ वटा भेराइटीमा झरेका छौं ।

पाहुनाको मागअनुसार होइन, हामीले सक्नेजति मेनु पस्किएका छौं । चौविसै घण्टा तातोपानी दिन र एसी/हिटर चलाउन सकेका छैनौं । पाँचतारे होटलले चौविसै घण्टा तातो पानीको व्यवस्था गर्नुपर्छ । पैसा तिरेपछि पर्यटकले सेवा सुविधा खोजिहाल्छन् ।

पर्यटक आइहाले पनि होटलमा राख्न सकेका छैनौं । पर्यटक राखेर मात्र भएन, खुवाउनु पर्छ, सेवा सुविधा दिनुपर्छ । दिन प्रतिदिन हामीले सेवा सुविधाहरु कटौती गर्नु परिहेको छ । अहिले जसरी पनि टिकाउँ, भोली समस्या समधान भइहाल्छ नी भन्ने आशामा चलिरहेका छौं ।

सुविधा कटौतीका कारण पक्कै पनि पाहुनाहरु खुसी छैनन् होला । यसले नेपालको पर्यटनको नकरात्मक मार्केटिङ हुने खतरा होला नी ?

पक्कै पनि हाम्रो सेवाबाट पर्यटक सन्तुष्ट छैनन् । हामीले २०/२५ प्रतिशतमात्र सेवा सुविधा दिन सकिरहेका छौं । पर्यटकले जे सोँचेर आउँछ, सोहीअनुसार सेवा नपाउँदा चित्त दुखाउनु स्वभाविक हो । तर, हामीले सकेसम्म उनीहरुलाई खुशी बनाउने प्रयत्न गरिरहेका हुन्छौं ।

हामीलाई माफ गर्नुस्, विशेष परिस्थितीका कारण प्रयाप्त सेवा दिन सकिएन भनेर पर्यटकलाई फकाउनु परिरहेको छ । नेपाल आउने पर्यटकले नराम्रो अनुभव लिएर आफ्नो मुलुक फर्किन्छन् । उनीहरुले नेपालबारे नराम्रो सन्देश प्रवाह गर्न सक्छन । यसबाट हामी डराउनुपर्ने नै हुन्छ । यो देशकै लागि घातक हुन सक्छ ।

अहिलेको अवस्था पहिलो पटक भने आएको होइन । सन् २००२ र २००३ मा हामीले भोगिसकेका छौं । हामीले यस्ता कुराहरु धेरै चाँडै बिर्सिन्छौं ।

तपाइँको भनाइअनुसार त अहिले करिव ७५ प्रतिशत सेवा सुविधा कटौती गरिसक्नुभएको रहेछ । टिकाइराख्ने रणनीतिलाई कतिसम्म लम्ब्याउन सकिएला जस्तो लाग्छ ?

यति नै समसम्म भनेर ठ्याक्कै भन्न त सक्दिन, तर अवस्था लम्बिएमा छिट्टै होटल बन्द गर्नुको विकल्प हुँदैन । सधै घाटामात्र भइरहृयो भने कति दिनसम्म चलाउन सकिन्छ र ? सन् २००२/००३ मा जस्तै नाम चलेका होटलहरु बन्द हुने अवस्था नआउला भन्न सकिन्न ।

तर, हालै सरकारले १ खर्ब रुपैयाँको पुनरुद्धार कोष खडा गर्ने निर्णय गरेपछि केही उत्साह थपिएको छ । सरकारले ५ प्रतिशत व्याजमा सहुलियत ऋण दियो, अन्य सेवा सुविधाहरु दियो भने बिजनेश टिकाइराख्न सहयोग पुग्छ ।

यसको मतलब नेपालका तारे होटलहरुलाई पूँजीकै संकट पर्ने अबस्था आइसक्यो । पुनरुद्धार कोषबाट पर्यटन व्यवसायीले गरेको अपेक्षा के हो ?

संकटको घडिमा सबैले इन्धन पाइरहेका छन्, पर्यटन क्षेत्रलाई उपेक्षा गरिएको छ । सरकारले पर्यटन क्षेत्रलाई पनि उच्च प्राथमिकतामा राख्नुपथ्र्यो । त्यही भएर हामी सरकारसँग गुनासो गरिरहेका छौं ।

सरकारले १ खर्ब रुपैयाँको पुनरुद्धार कोष खडा गर्ने निर्णय गरेपछि केही उत्साह थपिएको छ । सरकारले ५ प्रतिशत व्याजमा सहुलियत ऋण दियो, अन्य सेवा सुविधाहरु दियो भने बिजनेश टिकाइराख्न सहयोग पुग्छ ।

पर्यटन मन्त्रीले पर्यटन क्षेत्रलाई प्राथमिकतामा राखेर सेवा सुविधा उपलब्ध गराउने आश्वासन दिनुभएको छ । व्यवहारमा लागू भयो भने यो राम्रो कुरा हो । सरकारले पर्यटन उद्योगलाई बेग्लै किसिमको सुविधा दिनुपर्छ भन्ने हाम्रो पनि माग हो ।

बजारमा वस्तु तथा सेवाको भाउ बढ्दा होटलको लागत धान्न नसक्ने गरी बढेको छ । उच्च लागत धान्नका लागि ऋणको ब्याजदर घटाइदिनुपर्छ । ऋण तिर्ने समयावधि बढाइदिनुपर्छ । पाँच प्रतिशत व्याजमा उपलब्ध गराउने ऋण तत्कालै उपलब्ध गराउनुपर्छ । यसो भएमा संकटको बेलामा पनि हामीलाई काम गर्न उत्साह थपिन्थ्यो ।

सन् २०१५ पर्यटन व्यवसायका लागि कस्तो रहन गयो ?

पर्यटन व्यवसायीका लागि सन् २०१५ निकै निराशाजनक बन्यो । विनाशकारी भूकम्प, मधेस आन्दोलन र नाकाबन्दीले पर्यटन क्षेत्र पूर्ण रुपमा सुस्तायो । सो वर्ष पर्यटनका दुईवटै सिजन प्रभावित भए । सिजनमा ९०/९५ प्रतिशतसम्म अकुपेन्सी हुने पाँचतारे होटल ३०/३५ प्रतिशतमा सिमित हुन पुगे ।

मुलुकको पर्यटन क्षेत्रले विस्तारै गति लिन थालेको बेलामा भएको विपत्तीले दीर्घकालिन असर पारेको छ । होटलमात्र होइन, पर्यटकसँग जोडिएको सम्पूर्ण व्यवसाय नै धरासायी हुन पुग्यो । होटल बन्द हुने अवस्थामा पुगे भने धेरै रोजगारी कटौती भयो ।

अब फेब्रुअरीपछि त सिजन सुरु हुने बेला हो । यो सिजनमा धेरैभन्दा धेरै पर्यटक ल्याउन र पर्यटन उद्योगलाई पुनःजीवन दिन के गर्नुपर्छ जस्तो लाग्छ ?

सन् २०१५ निराशजनक बने पनि सन् २०१६ लाई उपलब्धी मुलुक बनाउनुपर्छ । अहिलेदेखि नै योजना बनाएर पर्यटन प्रवर्द्धनमा जुट्नुपर्छ । अहिलेको संकटको घडीमा हामी विगतमा भन्दा फरक ढंगले अन्तर्राष्ट्रिय बजारमा प्रवेश गर्नुपर्छ ।

पर्यटन बोर्डले चार वर्षपछि प्रमुख कार्यकारी पाएको छ । बोर्डका सिइओले रिजल्ट ओरिन्टेड मार्केटिङ र प्रचार अभियानहरु बनाउनुपर्छ । हामीले सन् २०१६ मा राम्रोसँग काम गर्न सक्यौं भने सन् २०१७ सम्ममा भूकम्प अघिकै अवस्थामा फर्किन सकिन्छ । नत्र भने सन् २००२/२००३ सालतिर फर्किनु सिवाय विकल्प रहँदैन ।

 

भूकम्पले मुलुक क्षतविक्षत भएको नकरात्मक सन्देश अन्तर्राष्ट्रिय जगतमा फैलिएको छ । सबैभन्दा पहिले हामी नेपालको यथार्थ अवस्थावारे विश्वभर सूचना प्रवाह गर्नुपर्छ । पर्यटन बोर्डमात्र नभई तालुक मन्त्रालय र निजी क्षेत्र पनि पर्यटन प्रवर्द्धनका लागि अग्रसर हुनुपर्छ ।

भूकम्पपछि विदेशी मिडियाले नेपालबारे धेरै नकरात्मक समाचार सम्प्रेशण गरे । तर, अहिले प्रख्यात मिडियाले नेपाललाई उत्कृष्ट गन्तव्यको सूचिमा राखेर भ्रमणमा जान प्रेरित गरिरहेका छन् । यसले कत्तिको फाइदा पुर्‍याउँछ ?

नेपाल विश्वको सबैभन्दा सुन्दर मुलुक हो । प्रकृतिले बरदान दिएको हाम्रो मुलुकमा प्रशस्त पर्यटकीय सम्भावना छन् । जसबाट हामीले थोरै पनि लाभ लिन सकेका छैनौं । यहाँ सिष्टमको कमजोरी, राजनीतिक अस्थिरता लगायतका कारण पर्यटन प्रवर्द्धन हुन नसकेको हो ।

त्यसमाथि भूकम्प, तराई आन्दोलन र नाकाबन्दीले त पर्यटन क्षेत्रलाई झनै क्षतविक्षत बनाइदिएको छ । हामीले पर्यटन प्रवर्द्धनका लागि अन्तर्राष्ट्रिय बजारमा बलियो उपस्थिती देखाउन नसकेको बेलामा विश्वप्रशिद्ध मिडियाले विश्वका उत्कृष्ट गन्तव्यको सूचिमा नेपालाई समेट्नु अत्यन्तै सकरात्मक कुरा हो ।

हामीले करोडौं रकम खर्चिएर प्रचार गर्न नसकिने काम विदेशी मिडियाले निःशुल्क गरिदिएका छन् । हामीले नेपालका कतिपय उत्कृष्ट गन्तव्य छुनै पाएका छैनौं । हामीसँग आवश्यक पूर्वाधार नहुँदा यस्तो भएको हो । पर्यटन प्रवर्द्धनका लागि पूर्वाधार पहिलो सर्त हो । हामीसँग मालमात्र भएर हुँदैन, आवश्यक पूर्वाधार विकास गरी सिष्टममा सुधार गर्न सक्नुपर्छ ।

हामीले पर्यटन प्रवर्द्धनका लागि अन्तर्राष्ट्रिय बजारमा बलियो उपस्थिती देखाउन नसकेको बेलामा विश्वप्रशिद्ध मिडियाले विश्वका उत्कृष्ट गन्तव्यको सूचिमा नेपालाई समेट्नु अत्यन्तै सकरात्मक कुरा हो ।

पूर्वाधार विकाश त निकै बृहत बिषय भयो । कुनकुन पूर्वाधारहरुले तत्कालै नेपालको पर्यटनमा टेवा दिन सक्छन् ?

पर्यटन विकासका लागि पहिलो पूर्वाधार भनेको विमानस्थल हो । हामीसँग एउटामात्र अन्तर्राष्ट्रिय विमानस्थल छ । जसको हालत अत्यन्तै नाजुक छ । अहिलेसम्म हामीसँग ३/४ वटा अन्तर्राष्ट्रिय विमानस्थल हुनुपथ्र्यो ।

ढिलै भएपनि भैरहवा र पोखरामा अन्तर्राष्ट्रिय विमानस्थल निर्माण सुरु भएको छ, यसलाई सकरात्मक रुपमा लिनुपर्छ । ढिलै भएपनि राष्ट्रिय ध्वजावाहक जहाजको संख्या बढेको छ । यी दुई कुराले हामीलाई थप आशावादी बनाएको छ ।

हामीले निर्माण सुरु गरेका विमानस्थल तोकिएकै समयमा सम्पन्न गर्नुपर्छ । राष्ट्रिय ध्वजावाहकको सख्ंया बढाएर युरोप अमेरिकासम्म उडान गर्नुपर्छ । यसले पर्यटक आगमनलाई ठूलो टेवा पुर्‍याउँछ ।

सँगसँगै आन्तरिक विमानस्थल र सडक विस्तारमा पनि जोड दिनुपर्छ । हामीसँग साहसिक पर्यटनको प्रशस्त सम्भावना छ । तर पनि पूर्वाधार विकास गर्न नसक्दा पछाडि परिरहेका छौं । यसतर्फ पनि ध्यान दिनुपर्छ । ‘रारा’ अत्यन्तै सुन्दर हुँदा हुँदै पनि पूर्वाधारको अभावले त्यहाँसम्म पर्यटक पुर्‍याउन सकेका छैनौं । यस्ता गन्तव्यहरु धेरै छन् ।

हामीले कस्तो पर्यटकीय प्रोडक्ट र गन्तव्यको बजारीकरण गर्नुपर्छ ? खासगरी कुन-कुन देश हाम्रो लागि पोटेन्सियल मार्केट हुन सक्छन् ? 

हामीसँग त्यस्ता धेरै पर्यटकीय प्रोडक्ट र गन्तव्यहरु रहेका छन्, जसबाट धेरै पर्यटक आकषिर्त गर्न सकिन्छ । हामीले तुलनात्मक लाभ भएका प्रोडक्ट र गन्तव्यको बजारीकरणमा जोड दिनुपर्छ । पछिल्लो समय साहसिक खेलमा पर्यटकको आकर्षण देखिएको हुँदा यसतर्फ जोड दिँदा राम्रो हुन्छ ।

हामीले खासगरी छिमेकी मुलुक भारत र चीनमा बढी फोकस गर्नुपर्छ । यहाँबाट बाह्रै महिना पर्यटक भित्राउन सकिन्छ । यसको अलवा शार्क मुलुक, मलेशिया, थाइल्यान्ड, सिंगापुर, जापान, युरोपियन तथा अमेरिकन मुलुकमा बढी जोड दिनुपर्छ ।

नेपालमा सांकृतिक, धार्मिक, साहकिस, वाइल्डलाइभ, हिमाल आरोहण, पदयात्रा लगायतमा विशेष रुची राख्ने पर्यटक भित्राउन सकिन्छ । तर, यी प्रोडक्टहरुको स्न्टान्डर्डलाइजेशन गर्नुपर्छ । आवश्यक पूर्वाधार निर्माण गर्नुपर्छ ।

नेपालको पर्यटन प्रवर्द्धनका लागि होटल एसोसिएसन अफ नेपालले कस्तो योजना बनाउँदै छ ?

हामीले पर्यटन मन्त्रालय, पर्यटन बोर्ड लगायसँग मिलेर पर्यटन प्रवर्द्धनमा जुट्ने हो । हामीले मन्त्रालय र बोर्डलाई अहिले देखिएका समस्या र समधानका उपायबारे जानकारी गराइरहेका छौं ।

हानले पनि अन्तर्राष्ट्रिय बजारमा पुगेर प्रमोसनका कामहरु गर्ने योजना बनाएको छ । हामी अन्तर्राष्ट्रिय टुरिजम फेयरहरु बेलायतमा हुने वल्र्ड ट्राभल मार्ट, बर्लिनमा हुने आइटीबी लगायतमा सहभागी भई आफ्नो प्रोडक्ट मार्केटिङ गर्छौं । अहिले सामाजिक सञ्जाल झन बलियो बन्दै गएको छ । यसतर्फ पनि बढी फोकस हुन्छौं ।

तपाइँले नेपाली पर्यटन उद्योगको सम्भावनाबारे बताइहाल्नुभयो । लगानीकर्ताका रुपमा होटल बिजनेस कत्तिको आर्कषक क्षेत्र हो ?
यदि होटलबाट सय रुपैयाँ कमायौं भने ५० रुपैयाँ सप्लायर्सलाई तिनुपर्छ । २५ रुपैयाँसरकारलाई कर र १५ रुपैयाँ सञ्चालन खर्च कटाउँदा १० रुपैयाँ बाँकी हुन आउँछ । बाँकी रहेको १० प्रतिशतबाट बैंकको ऋण र ब्याज तिर्नुपर्छ । त्यसो हुँदा होटलबाट त्यति धेरै लाभ हुँदैन् ।

होटलमा अकुपेन्सी राम्रो भयो, खर्चालु पर्यटक आइदिए भनेमात्र नाफा कमाउने हो । नत्रभने घाटामै चल्नुपर्ने हुन्छ । अहिलेकै जस्तो अवस्था भइदियो भने उल्टै डुबिन्छ ।

होटलमा अकुपेन्सी राम्रो भयो, खर्चालु पर्यटक आइदिए भनेमात्र नाफा कमाउने हो । नत्रभने घाटामै चल्नुपर्ने हुन्छ । अहिलेकै जस्तो अवस्था भइदियो भने उल्टै डुबिन्छ ।

तर, अन्य व्यवसायमा जमेका ठूला व्यवसायीक घराना र विदेशी चेन होटलहरु धमाधम नेपालमा लगानी गर्न तम्सिएका छन् । किन होला ?

नेपालमा पर्यटनको ठूलो सम्भवना देखेर स्वदेशी तथा विदेशी लगानीकर्ताको आकर्षण देखिएको हो । नेपालको सम्भवना अनुसार पर्यटक भित्रिने हो भने यो व्यवसाय सबैभन्दा लाभदायक हुनसक्छ ।

हाम्रो मुलुक विश्वकै सुन्दर र अवसर भएको मुलुक हो । विश्वका उत्कृष्ट गन्तव्यहरुको सूचिमा नेपाल पर्छ । यहाँ सर्वोच्च शिखर छ, बुद्धको जन्मस्थल छ, सुन्दर हिमाल तथा पहाड छ । जसलाई पर्यटकले अत्याधिक मन पराउँछन् । यहाँ धार्मिक तथा सांस्कृतिक पर्यटक भित्राउन सकिने पनि प्रशस्त सम्भवना छ ।

सामान्य प्रचार प्रसारको भरमा १० लाखको हाराहारीमा पर्यटक आउँछन भने राम्रोसँग प्रवर्द्धनको काम गर्न सकियो भने धेरै पर्यटक भित्राउन सकिन्छ । तपाईले उउत्पादनशील उद्योग चलाउनुभयो भने कच्चा पदार्थ ल्याउनुपर्‍यो, त्यसलाई प्रशोधन गर्नुपर्‍यो, बजारमा लगेर बेच्नुपर्‍यो । यो सबै झण्झटिलो र महंगो छ । त्यो भन्दा सेवा क्षेत्र धेरै सहज हुन्छ ।

अन्नपूर्ण होटलमा अन्तर्राष्ट्रिय चेन ‘दुसित थानी’ ल्याउने प्रकृया के भइरहेको छ ?

दुसित थानी र हाम्रो बीचमा सहकार्यका लागि सम्भाव्यता अध्ययन गर्ने सम्झौता भएको थियो । अध्ययनकै प्रकृयामा रहँदै भूकम्प लगायतका समस्या आइहाल्यो । उहाँहरुले अहिलेको परिस्थिती हामीलाई थाहा छ । अध्ययनको समय थप्नुपर्छ भन्नुभएको छ । उहाँहरुले लगानीको सम्भवना देखियो भेन तपाईहरुसँग सहकार्य गर्छौं भन्नुभएको छ ।

नेपाल आउने निर्णयबाट फिर्ता भयो भन्ने सुनिन्छ नी ?

त्यस्तो हैन ।

उसोभए अन्नपूर्ण होटलले अन्तर्राष्ट्रिय चेन भित्राउँछ ?

अन्तर्राष्ट्रिय चेनसँग सहकार्य भयो भने बजारीकरणमा सहयोग हुन्छ । स्टान्डर्ड र सिष्टममा विकास हुन्छ । उनीहरु अन्तर्राष्ट्रिय स्टान्डर्ड र सिष्टममा चलेका हुन्छन् । यसका लागि पनि चेन ल्याउनुपर्ने हुन्छ ।

 

हामी फ्रेञ्चाइज वा म्यानेजमेन्ट कन्ट्रयाक्टमा चेन भित्राउँछौं । हामी अन्तर्राष्ट्रिय बजारमा पुग्न सकिरहेका छैनौं । अहिले विश्वभरका होटल चेनमा जानु सिष्टम रहेर काम गर्न सजिलो हुने भएर हो । मलाई लाग्छ, अहिलेको अवस्थामा चेन अतिआवश्यक छ ।

अन्नपूर्ण होटलको स्तरोन्नती गर्ने काम के भइरहेको छ ?

हाम्रो होटलले सञ्चालनको ५० वर्ष पुरा गरिसकेको छ । धेरै पुरानो भएपछि होटलको स्तरोन्नती गर्नुपर्ने हुन्छ । हामीले पछिल्लो समय लगानी गरेर होटलको स्तरोन्नती गर्ने योजना बनाएका थियौं । तर, भूकम्प, बन्द हडताल र नाकाबन्दी लगायतका कारणले रोकिन पुगेको छ । सहज वातावरण हुनासाथ काम अघि बढाउँछौं । हामीले ट्रेनिङ स्कुल खोल्ने, रुमहरु थप्ने, ब्याङक्वेट विस्तार गर्ने लगायतको कामहरु गर्ने तयारीमा थियौं ।

होटल थप्ने योजना छ की ?

चितवनको जगतपुरमा होटल खोल्ने योजनामा थियौं । त्यहाँ ‘हाई स्टान्डर्ड’को रिसोर्ट खोल्न जग्गा समेत लिइसकेका छौं । लामो समयदेखि राजनीतिक स्थिरता नहुँदा ‘पर्ख र हेर’को अवस्थ्ाामा छौं । राजनीतिक स्थिरता भयो र पर्यटकको संख्या बढ्न थाल्यो भने रिसोर्टको काम अगाडि बढाउँछौं ।

साभार: अनलाइन खबर

You may also Like this

थप समाचार

अन्नपूर्ण बुद्धिचाल प्रतियोगिताको उपाधि पायोनियरलाई
अन्नपूर्ण बुद्धिचाल प्रतियोगिताको उपाधि पायोनियरलाई

काठमाडौँ । १३ औं राष्ट्रव्यापी विद्यालयस्तरीय अन्नपूर्ण मैत्री खुला बुद्धिचाल प्रतियोगिताको उपाधि कपनमा रहेको पायोनियर पब्लिक ...

काठमाण्डौमा अन्तरघातका कारण कांग्रेस पछाडि पर्योः युवा नेता सिग्देल
काठमाण्डौमा अन्तरघातका कारण कांग्रेस पछाडि पर्योः युवा नेता सिग्देल

काठमाडौँ । गत बैसाख ३१ गते सम्पन्न स्थानिय निकायको चुनाबी परिणाम नेपाली कांग्रेसका लागि सन्तुष्टिजनक देखिएन । कांग्रेसको बाहु ...

बुढानिलकण्ठ नगरका जनतामा परिचित र लोकप्रिय पार्टी एमाले नै हो, हामीले जित्छौँः उद्धव खरेल
बुढानिलकण्ठ नगरका जनतामा परिचित र लोकप्रिय पार्टी एमाले नै हो, हामीले जित्छौँः उद्धव खरेल

काठमाडौँ । मुलुक यत्ति बेला चुनाबि महोलले केन्द्रित रहेको छ । पार्टीका उम्मेदवारहरु अहिले नगर, वडा–बासीहरुको घर दैलो का ...

माओवादी जनताको साथी हो, नीति र नेतृत्वको जिम्मा लिन तयार छः अधिकारी (अन्तरवार्ता)
माओवादी जनताको साथी हो, नीति र नेतृत्वको जिम्मा लिन तयार छः अधिकारी (अन्तरवार्ता)

काठमाडौँ । १९ बर्ष पछी हुन लागेको स्थानिय निकायको चुनाबी रौनक यति बेला चिया पसल देखि उच्च स्थानसम्म बहसको विषय बन्न थालेको छ ...

IME Rashifall Ncell

worldब्लग /विचारपुरा हेर्नुहोस्

दातको दुखाई र समाधान

सामान्यतया दाँतको दुखाई दुई प्रकारको हुने गर्दछ ।  (१) दाँत किराले खाएर/सड्दै/बिग्रदै दुख्ने(२) दाँत किराले नखाई/नसड्दै/नबिग् ...


भारत ब्रिटिसको गुलाम थियो, त्यहाँ अझै ब्रिटिसको बिऊ बाकी छ

रवि भट्टराई । रोटी र बेटीको संबन्ध हो भनेर नेपाल र भारतको सम्बन्धलाई आफै प्रस्ट्याउने भारतले, बेटीलाई रोटी बन्द गर्ने तहसम्म आफै ...