६ असोज, काठमाडौं । चिकित्सकहरुले शुक्रबारदेखि देशभरका स्वास्थ्य संस्थामा आकस्मिक बाहेकका सबै सेवा ठप्प पारेका छन् ।

उपचारका क्रममा बिरामीको मृत्यु भए उपचारमा संलग्न चिकित्सक स्वयंले क्षतिपूर्ति बेहोर्नुपर्ने सरकारी निर्णयको विरोधमा चिकित्सकहरुले आन्दोलन गरेका हुन् ।

अस्पताल र नर्सिङहोममात्रै होइन, क्लिनिकसमेत बन्द हुँदा बिरामीहरु अत्यावश्यक उपचार सेवा पाउनबाट बन्चित भएका छन् ।

नेपाल चिकित्सक संघले निर्णय सच्याउन सरकारलाई ७२ घन्टे अल्टिमेटम दिएको थियो । तर, निर्णय यथावत रहेपछि संघ अनिश्चितकालीन आन्दोलनमा उत्रिएको हो ।

संघले सरकारसँग तीन बुँदे माग राखेको छ । चिकित्सक स्वयंले मृतकका परिवारलाई क्षतिपूर्ति दिनुपर्ने भनेर २ असोजमा मन्त्रिपरिषद बैठकबाट भएको निर्णय फिर्ता लिनुपर्ने उसको मुख्य माग छ । यस्तै, स्वास्थ्यकर्मी तथा स्वास्थ्य संस्थाको सुरक्षासम्बन्धी ऐन २०६६ र नियमावली २०६९ परिमार्जन गरी स्वास्थ्यकर्मी तथा स्वास्थ्य संस्थामाथि हातपात गर्नेलाई बिना धरौटी जेल चलान गर्नुपर्ने र विगतमा भएका सहमति कार्यान्वयन गर्नुपर्ने माग पनि नेपाल चिकित्सक संघले राखेको छ ।